వాకింగ్‌ vs స్కిప్పింగ్‌.. వేగంగా బరువు తగ్గాలంటే ఏది బెస్ట్‌?

బరువు తగ్గాలంటే వ్యాయామం తప్పనిసరి. అయితే ఇందుకోసం జిమ్‌కు వెళ్లాల్సిన అవసరం లేదు. రోజూ వాకింగ్‌ చేయడం లేదా స్కిప్పింగ్‌ చేయడం ద్వారా కూడా శరీరాన్ని చురుగ్గా ఉంచుకోవచ్చు. అయితే ఈ రెండింటిలో వేగంగా బరువు తగ్గేందుకు ఏది ఎక్కువ ఉపయోగపడుతుంది? నిపుణుల సూచనల ప్రకారం.. మీ శారీరక సామర్థ్యం, వ్యాయామం చేసే సమయం, ఆరోగ్య పరిస్థితిని బట్టి ఎంపిక మారుతుంది.

వాకింగ్‌.. సులభంగా మొదలుపెట్టొచ్చు
వాకింగ్‌ తక్కువ ప్రభావం చూపే వ్యాయామం. కీళ్లపై ఎక్కువ ఒత్తిడి ఉండదు. అందుకే వ్యాయామం కొత్తగా మొదలుపెట్టేవారికి ఇది మేలు. వేగంగా నడిస్తే గుండె వేగం పెరుగుతుంది. శరీరంలో ఎక్కువ క్యాలరీలు ఖర్చవుతాయి.

ఎన్ని క్యాలరీలు ఖర్చవుతాయనేది వ్యక్తి బరువు, నడక వేగం, నడిచే ప్రదేశం, సమయం వంటి అంశాలపై ఆధారపడి ఉంటుంది. మెట్లు ఎక్కడం, కొండ ప్రాంతాల్లో నడవడం, కొంతసేపు వేగంగా నడవడం ద్వారా మరింత శ్రమ పెట్టొచ్చు. రోజువారీ పనుల్లోనే వాకింగ్‌ను భాగం చేసుకోవడం సులభం.

స్కిప్పింగ్‌.. తక్కువ సమయంలో ఎక్కువ శ్రమ
స్కిప్పింగ్‌ అంటే తాడుతో గెంతడం. ఇది అధిక తీవ్రత కలిగిన కార్డియో వ్యాయామం. గెంతే సమయంలో కాళ్లు, చేతులు, పొట్ట భాగంలోని కండరాలు పనిచేస్తాయి. గుండె వేగం కూడా త్వరగా పెరుగుతుంది.

స్కిప్పింగ్‌లో ప్రధాన ప్రయోజనం తక్కువ సమయంలోనే ఎక్కువ శ్రమ పెట్టగలగడం. వాకింగ్‌తో పోలిస్తే నిమిషానికి ఎక్కువ క్యాలరీలు ఖర్చయ్యే అవకాశం ఉంటుంది. సమన్వయం, బ్యాలెన్స్‌, చురుకుదనం కూడా మెరుగుపడతాయి.

అయితే గెంతడం వల్ల మోకాళ్లు, చీలమండలు వంటి కీళ్లపై ఎక్కువ ఒత్తిడి పడుతుంది. అందుకే తొలిసారి చేసేవారు మొదట్లో తక్కువ సమయం కేటాయిస్తూ క్రమంగా పెంచుకుంటూ పోవాలి.

బరువు తగ్గేందుకు..
నిమిషానికి క్యాలరీలు ఖర్చు చేసే విషయంలో స్కిప్పింగ్‌ ముందుంటుంది. కానీ బరువు తగ్గడం అంటే కేవలం ఎక్కువ క్యాలరీలు ఖర్చు చేయడమే కాదు. ఆహారం ద్వారా తీసుకునే క్యాలరీల కంటే శరీరం ఖర్చు చేసే క్యాలరీలు ఎక్కువగా ఉండాలి.

ఉదాహరణకు.. ఒక వ్యక్తి 10 నిమిషాలు మాత్రమే స్కిప్పింగ్‌ చేయగలిగితే, మరో వ్యక్తి 45 నిమిషాలు సౌకర్యంగా నడవగలడు. అలాంటప్పుడు ఎక్కువసేపు చేసిన వాకింగ్‌ కూడా గణనీయమైన క్యాలరీలను ఖర్చు చేయవచ్చు. అందుకే రోజూ చేయగలిగే వ్యాయామాన్ని ఎంచుకోవడం ముఖ్యం.

మొదటిసారి వ్యాయామం చేసేవారికి?
వ్యాయామం కొత్తగా మొదలుపెట్టేవారు సాధారణంగా వాకింగ్‌తో ప్రారంభించడం మంచిది. మొదట నెమ్మదిగా నడిచి, తర్వాత వేగాన్ని పెంచుకోవచ్చు. శారీరక సామర్థ్యం పెరిగిన తర్వాత కొద్దిసేపు స్కిప్పింగ్‌ను కూడా చేర్చుకోవచ్చు.

మోకాళ్లు, చీలమండలు వంటి కీళ్లలో ఇబ్బందులు ఉన్నవారు అధిక ప్రభావం కలిగించే స్కిప్పింగ్‌ మొదలుపెట్టే ముందు వైద్య నిపుణుల సలహా తీసుకోవడం మంచిది.

రెండింటినీ కలిపితే?
వాకింగ్‌, స్కిప్పింగ్‌లో ఒకదానినే ఎంచుకోవాల్సిన అవసరం లేదు. రోజూ వాకింగ్‌ చేస్తూ.. వారంలో కొన్ని రోజులు తక్కువ సమయం స్కిప్పింగ్‌ చేయవచ్చు. ఇలా చేస్తే తక్కువ తీవ్రత, అధిక తీవ్రత వ్యాయామాలు రెండూ రొటీన్‌లోకి వస్తాయి.

మొత్తంగా చూస్తే.. తక్కువ సమయంలో ఎక్కువ క్యాలరీలు ఖర్చు చేయాలంటే స్కిప్పింగ్‌తో ప్రయోజనం ఉంది. సులభంగా, ఎక్కువకాలం కొనసాగించగల వ్యాయామం కావాలంటే వాకింగ్‌ మంచి ఎంపిక. అయితే బరువు తగ్గడంలో వ్యాయామంతో పాటు సమతుల ఆహారం, తగినంత నిద్ర, క్రమం తప్పకుండా వ్యాయామం చేయడం కూడా కీలకం.

గమనిక: ఈ సమాచారం అవగాహన కోసం మాత్రమే. ఆరోగ్య సమస్యలు ఉన్నవారు కొత్త వ్యాయామం ప్రారంభించే ముందు వైద్య నిపుణుల సలహా తీసుకోవాలి.